Elm və texnologiyanın bu qədər inkişafına baxmayaraq beynimiz kainatın ən mürəkkəb və sirri tam olaraq açılmayan maddi “varlığı” titulunu qoruyub saxlayır. Bu səbəbdən, şüur nədir sualına alimlər cavab verməkdə hələ də çətinlik çəkirlər. Bizi digər canlılardan fərqli qılan yeganə özəlliyimiz haqqında cavablanmamış sualların olması səncə də çox ironik deyil? Bəlkə də bu səbəbdən insan övladı kainatda olan yerini təyin edə bilmir..
Alimlər bir mövzuda həmfikirdilər ki, biz bütün qərarlarımızı, hərəkətlərimizi, davranışlarımızı şüurumuzun birbaşa müdaxiləsi altında etmirik. Əsas rolu şüuraltı öz üzərinə götürüb. İqleman isə vəziyyəti belə şərh edir: “Şüur beyin əməliyyatlarının mərkəzində durmur. Əksinə, küncdə-bucaqdadır, beyində fasiləsiz işləyən “çarxların” səsini uzaqdan eşidir”.
Bütün bunlar ilk baxışda ədalətsiz görünə bilər. Öz bədənimizin içində 1.4 kq-lıq ət parçasının necə əmələ gətirdiyini bilmədiyimiz şüuraltı bizim yerimizə qərarlar verir, hərəkətlərimizi təyin edir, hansı ki bu hallar, adətən, peşmanlıq və ya hüsranla nəticələnir. Üstəlik, bu “özbaşınalığına” görə şüuraltı özünə haqq qazandırmağı da çox yaxşı bacarır. Öyrəndiklərimdən belə nəticə çıxarıram ki, hər nə qədər çətin də olsa bütün hakimiyyəti şüuraltına verməyə bilərik. Çünki, bir məlumatı şüurlu şəkildə dərk etdikdə və ya baş verənlərin fərqində olduqda şüuraltının qərarlarımıza təsiri azalır. Yenə də üzərimizə düşən sorğulamaq, düşünmək, beynimizdə “default” olaraq mövcud funksiyalardan yararlanmaqdır.