Ətrafda baş verən hər şeyi bir-birilə əlaqələndirməyə çox böyük marağı olan beynim saçlarımın uzanmamasından da bir əlaqə çıxartmışdı. Mən də beynimin bu analizini dəyərləndirdim. Və vaz keçdim..
Öyrəndikcə dərk edirəm ki, bu həyatda ən böyük yatırımı məhz elə öz beynim üçün etməliyəm. Çünki, həmin yatırımlar olmadan cahillikdən, önyargılardan, əsassız düşüncə qəliblərindən ibarət beynin hökmlərinə məhkum oluruq. Öz adıma belə bir beyni çiyinlərim üzərində daşımaq istəmirəm. Bu, sonsuz qallaktikaların analogiyası olan neyronlarıma etdiyim ən böyük haqsızlıq olar.
ÜZR İSTƏYİRƏM
..Bunlar 28 illik ömrümə sığdırdığım səhvlərimin hamısı deyil əlbəttə. Xeyli az hissəsidir. Amma yenə də bu üzrüm burada qalsın. Təkrar - təkrar oxuyum, özümə xatırladım, unutmayım, yaddaşıma həkk edim. Əgər unutsam, həyat xatırlatmaqda gecikməsin. Ki indiyə qədər heç vaxt gecikməyib..
YENİDƏN
..Qısa müddətli də olsa günəş üzərində öz qələbəsini təntənəli şəkildə qeyd edən yağışın dünyanın bütün parfümlərindən qat-qat məftunedici olan qoxusu saçlarıma sinərkən, şəffaf damcıları ömür səhifəmə öz izini həkk edirdi: “Yenidən”..
QUMDAN QALALAR
Planlar qurmağın dəniz sahilində qumdan qalalar qurmaqdan heç bir fərqi yoxdur. Gün gələr “dənizdə” tufan qopar, dalğaları “sahildə” nə varsa yuyub aparar. Gələcək haqqında heç bir hökmümüzün olmadığını aydın şəkildə göstərər. Məncə, dənizin məqsədi bizi incitmək, yıxmaq deyil. Qurduğumuz qalaların bünövrəsinin zəif olduğunu göstərməkdi. Hətta bəlkə də dəniz bizimlə danışır bu yolla. Bizə yalnış yerdəsən deyir bəlkə də. Daha da güclənməlisən deyir. Həyatını sahil kənarında qumdan qala qurmaqla keçirmə deyir. Yeni üfüqlər kəşf et, daha çox hiss et, daha çox xatirə topla, anı yaşa deyir. Çünki, yalnız bu anımız haqqında hökmümüz var.